ശരണമന്ത്രങ്ങളും ഭജനഗീതങ്ങളും മുഴങ്ങും: ദ്വാരകയിൽ അയ്യപ്പപൂജ നാളെ

ദ്വാരക മലയാളി അസോസിയേഷൻ സംഘടിപ്പിക്കുന്ന അയ്യപ്പപൂജ നാളെ പുലർച്ചെ 5.30 ന് ഗണപതി ഹോമത്തോടെ സമാരംഭിക്കും. ദ്വാരക സെക്‌ടർ 14 ലെ രാധികാ അപ്പാർട്ട്‍മെന്‍റിനോട് ചേർന്നുള്ള DDA പാർക്കിലാണ് വേദി. അസോസിയേഷന്‍റെ 24-ാമത് പൂജയാണ് നടക്കുന്നത്.

പ്രഭാത പൂജക്ക് ശേഷം ശ്രീകൃഷ്‍ണ ഭജന സമിതിയുടെ സഹസ്രനാമാഞ്ജലിയും, ഹസ്‍താലിലെ ഭാരതി ബാലഗോകുലത്തിന്‍റെ ഭജനയും ഉണ്ടായിരിക്കും. ചെണ്ടമേളത്തിന്‍റെ അകമ്പടിയോടെ താലപ്പൊലിയുമായി ഓം അപ്പാർട്ട്‍മെന്‍റിലെ റാം മന്ദിറിൽ നിന്നുള്ള ശോഭായാത്ര വൈകിട്ട് 5 മണിക്ക് ആരംഭിച്ച് 6.30 ന് പൂജാവേദിയിലെത്തും.

ഡൽഹിയിലെ ഇന്ദ്രപ്രസ്ഥ കലാവേദിയുടെ ശ്രീ മണികണ്ഠൻ നൃത്തസംഗീത നാടകമാണ് ഈ വർഷത്തെ പൂജയുടെ ഹൈലൈറ്റ്. വൈകിട്ട് 7 മണി മുതൽ 9.30 വരെയാണ് നാടകം അരങ്ങേറുക.