മിഷനറി ചൈതന്യത്തിന്റെ പുനരർപ്പണവുമായി എം.എസ്.ടി വൈദികർ ഡൽഹിയിൽ ഒത്തുചേർന്നു

ന്യൂഡൽഹി: ഭാരതത്തിന്റെ അപ്പോസ്തലനായ മാർ തോമാശ്ലീഹായുടെ പ്രേഷിത ചൈതന്യം നെഞ്ചേറ്റുന്ന മിഷണറി സൊസൈറ്റി ഓഫ് സെന്റ് തോമസ് (MST) സഭയുടെ സ്ഥാപകദിനം ഡൽഹി മേഖലയിൽ സമുചിതമായി ആഘോഷിച്ചു.

ഫെബ്രുവരി 22-നാണ് സഭയുടെ ഔദ്യോഗിക സ്ഥാപകദിനമെങ്കിലും, പ്രാദേശിക സൗകര്യങ്ങൾ പരിഗണിച്ച് നജഫ്ഗഡ് ദീപ്തി ആശ്രമത്തിൽ ഫെബ്രുവരി 18-ന് മുൻകൂട്ടി ആഘോഷങ്ങൾ സംഘടിപ്പിച്ചു.

ഡൽഹി, ജമ്മു, പഞ്ചാബ്, ഹിമാചൽ പ്രദേശ് എന്നീ സംസ്ഥാനങ്ങളിൽ ശുശ്രൂഷ ചെയ്യുന്ന വൈദികരും ഫരീദാബാദ് രൂപതയിൽ സേവനമനുഷ്ഠിക്കുന്ന എം.എസ്.ടി വൈദികരും സംഗമത്തിൽ പങ്കെടുത്തു.

ഹൃദയപരിവർത്തനത്തിന്റെ സന്ദേശവുമായി ദിവ്യബലി

രാവിലെ 7 മണിക്ക് അർപ്പിക്കപ്പെട്ട വിശുദ്ധ കുർബാനയോടെയാണ് ആഘോഷങ്ങൾക്ക് തുടക്കമായത്. റവ. ഫാ. അജിത് എം.എസ്.ടി മുഖ്യകാർമ്മികനായിരുന്നു. റവ. ഫാ. ജോസഫ് വെമ്പാനി എം.എസ്.ടി സഹകാർമ്മികത്വം വഹിച്ചു. മേരി ക്വീൻ മിഷൻസ് റീജിയണൽ ഡയറക്ടർ റവ. ഫാ. ജോസഫ് കരോടൻ എം.എസ്.ടി വിശുദ്ധ കുർബാനയ്ക്കിടെ ഹൃദയസ്പർശിയായ വചനസന്ദേശം നൽകി. സഭയുടെ സ്ഥാപകർ വിഭാവനം ചെയ്ത പ്രേഷിത ലക്ഷ്യങ്ങൾക്കനുസൃതമായി ജീവിതം ക്രമീകരിക്കാൻ അദ്ദേഹം വൈദികരെ ആഹ്വാനം ചെയ്തു.

> "സക്കേവൂസിന്റെ ജീവിതത്തിലുണ്ടായതുപോലെ, ക്രിസ്തുവുമായുള്ള കണ്ടുമുട്ടൽ ഹൃദയത്തിൽ നിന്ന് തുടങ്ങുന്ന ആഴമായ പരിവർത്തനത്തിന് വഴിമാറണം. ക്രിസ്തുവിനെ കണ്ടുമുട്ടിയപ്പോൾ സക്കേവൂസ് പൂർണ്ണമായി രൂപാന്തരപ്പെട്ടു. ആ പരിവർത്തനമാണ് ഓരോ മിഷണറിയെയും യഥാർത്ഥ ക്രിസ്തുസാക്ഷിയാക്കുന്നത്," അദ്ദേഹം ഓർമ്മിപ്പിച്ചു.

>

സൗഹൃദസംഗമവും ഡൽഹി ദർശനവും

ആത്മീയ വിരുന്നിനുശേഷം വൈദികർ ഒത്തുചേർന്ന് സ്നേഹവിരുന്നിൽ പങ്കെടുത്തു. തുടർന്ന് നടന്ന 'ഡൽഹി ദർശൻ' നഗരയാത്ര വൈദികർക്ക് നവോന്മേഷം പകരുന്നതായിരുന്നു. ഭാരതത്തിന്റെ വിവിധ ഭാഗങ്ങളിൽ ഒറ്റപ്പെട്ട മിഷൻ മേഖലകളിൽ സേവനം ചെയ്യുന്ന വൈദികർക്ക് ഈ ഒത്തുചേരൽ പ്രേഷിത ചൈതന്യം പങ്കുവെക്കാനുള്ള വേദി കൂടിയായി മാറി.

റവ. ഫാ. അബിൻ കുരുവാംപ്ലാക്കൽ എം.എസ്.ടി ആഘോഷങ്ങളുടെ ഏകോപനം നിർവ്വഹിച്ചു. സ്ഥാപകദിനത്തിന്റെ സ്മരണയിൽ, കൂടുതൽ തീക്ഷ്ണതയോടെ സുവിശേഷ സാക്ഷ്യമായി മാറണമെന്ന അടിയുറച്ച ബോധ്യത്തോടെയാണ് സംഗമം സമാപിച്ചത്.