ഉത്തരവാദിത്വപൂർണമായ നേതൃത്വത്തിലൂടെ സഭയെയും രാജ്യത്തെയും ശക്തിപ്പെടുത്താൻ കത്തോലിക്കാ അല്മായർ മുന്നിട്ടിറങ്ങണം: കർദിനാൾ ആന്റണി പൂല

ന്യൂഡൽഹി, ആഗസ്റ്റ് 22, 2026: സഭയുടെയും രാജ്യത്തിന്റെയും ജീവിതത്തിൽ കൂടുതൽ ഉത്തരവാദിത്വത്തോടെ പങ്കുചേരുകയും ഉത്തരവാദിത്വബോധമുള്ള പൗരന്മാരും ധീരരായ നേതാക്കളും പൊതുനന്മയ്ക്കായി പ്രതിബദ്ധതയോടെ പ്രവർത്തിക്കുന്നവരുമായി കത്തോലിക്കാ അല്മായർ മാറണമെന്നും കാത്തലിക് ബിഷപ്സ് കോൺഫറൻസ് ഓഫ് ഇന്ത്യ (CBCI) പ്രസിഡന്റ് ആന്റണി കർദിനാൾ പൂല ആഹ്വാനം ചെയ്തു.

ന്യൂഡൽഹിയിലെ ഡോൺ ബോസ്കോ പ്രൊവിൻഷ്യൽ ഹൗസിൽ ആഗസ്റ്റ് 22, 23 തീയതികളിൽ നടക്കുന്ന ഓൾ ഇന്ത്യ കാത്തലിക് യൂണിയന്റെ (AICU) 12-ാമത് വർക്കിംഗ് കമ്മിറ്റി യോഗത്തിനും 72-ാമത് വാർഷിക ജനറൽ ബോഡി യോഗത്തിനും നൽകിയ സന്ദേശത്തിലാണ് കർദിനാൾ ഇക്കാര്യം വ്യക്തമാക്കിയത്. CBCI ഡെപ്യൂട്ടി സെക്രട്ടറി ജനറൽ റവ. ഡോ. മാത്യു കോയിക്കൽ മുഖേനയാണ് കർദിനാളിന്റെ സന്ദേശം സമ്മേളനത്തിൽ അറിയിച്ചത്.

ഇന്ത്യയുടെ ദേശീയ ജീവിതത്തിൽ കത്തോലിക്കാ അല്മായരുടെ പങ്കാളിത്തത്തിന് ദീർഘവും ശ്രദ്ധേയവുമായ ചരിത്രമാണ് AICU-വിനുള്ളതെന്ന് കർദിനാൾ പറഞ്ഞു. 1919-ൽ സ്ഥാപിതമായ AICU ഒരു നൂറ്റാണ്ടിലേറെയായി ഇന്ത്യയിലെ കത്തോലിക്കാ അല്മായരെ പ്രതിനിധീകരിക്കുകയും അവരുടെ പങ്കാളിത്തവും നേതൃത്വവും പ്രോത്സാഹിപ്പിക്കുകയും ചെയ്യുന്ന ദേശീയ സംഘടനയായി പ്രവർത്തിച്ചുവരുന്നു. ഇന്നത്തെ സാഹചര്യത്തിൽ ഈ ദൗത്യം കൂടുതൽ ശക്തിപ്പെടുത്തേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.

സഭയോടും സമൂഹത്തോടും രാജ്യത്തോടുമുള്ള ഉത്തരവാദിത്വം തിരിച്ചറിഞ്ഞ് പ്രവർത്തിക്കുന്ന അല്മായ നേതൃത്വമാണ് ഇന്നത്തെ കാലഘട്ടത്തിന്റെ ആവശ്യമെന്ന് കർദിനാൾ വ്യക്തമാക്കി. ക്രിസ്തീയ വിശ്വാസത്തിൽ ആഴമായി വേരൂന്നിയതും സഭയോട് ഐക്യപ്പെട്ടതും പൊതുജീവിതത്തിൽ ഉത്തരവാദിത്വത്തോടെ ഇടപെടുന്നതുമായ അല്മായർ രാജ്യത്തിന്റെ പൊതുനന്മയ്ക്കും മനുഷ്യവ്യക്തിയുടെ അന്തസ്സിനും വേണ്ടി പ്രവർത്തിക്കണമെന്നും അദ്ദേഹം ആഹ്വാനം ചെയ്തു.

ആഗസ്റ്റ് 22ന് രാവിലെ നടന്ന solemn Eucharistic Celebration-ോടെയാണ് സമ്മേളനത്തിന് ഔപചാരിക തുടക്കമായത്. സിംല-ചണ്ഡിഗഢ് രൂപതയുടെ ബിഷപ്പ് എമിരിറ്റസ് റൈറ്റ് റവ. ഇഗ്നേഷ്യസ് മസ്കരീന്യാസ് വിശുദ്ധ കുർബാനയ്ക്ക് മുഖ്യകാർമികത്വം വഹിച്ചു. റവ. ഫാ. ജോർജ് മണിമല, ഫാ. ജൂലിയസ് സീസർ, ഫാ. സുസൈ സെബാസ്റ്റ്യൻ, ഫാ. ലോറൻസ് പി.ആർ., CBCI സോഷ്യൽ കമ്മ്യൂണിക്കേഷൻ ഓഫീസിന്റെ നാഷണൽ സെക്രട്ടറി റവ. ഡോ. ബിജു അലാപ്പാട്ട് എന്നിവർ സഹകാർമികരായി.

തുടർന്ന് നടന്ന ഉദ്ഘാടന സമ്മേളനത്തിന് AICU നാഷണൽ പ്രസിഡന്റ് ശ്രീ ലാൻസി ആർ. വാസ് അധ്യക്ഷത വഹിച്ചു. ബിഷപ്പ് എമിരിറ്റസ് ഇഗ്നേഷ്യസ് മസ്കരീന്യാസ് മുഖ്യാതിഥിയായിരുന്നു. AICU നാഷണൽ വൈസ് പ്രസിഡന്റ് ശ്രീ എ. ചിന്നപ്പ പങ്കെടുത്തു. ശ്രീ എ.സി. മൈക്കിൾ സ്വാഗതം ആശംസിച്ചു.

അഡ്വ. ജന്നീസ് ഫ്രാൻസീസ് നന്ദി അറിയിച്ചു.

CBCI കൗൺസിൽ ഫോർ ലെയ്റ്റിയുടെ നാഷണൽ സെക്രട്ടറി അഡ്വ. എബ്രഹാം പട്ടിയാനി സമ്മേളനത്തെ അഭിവാദ്യം ചെയ്യുകയും CBCI കൗൺസിൽ ഫോർ ലെയ്റ്റിയുടെ ചെയർമാനും AICU-യുടെ എക്ലീസിയാസ്റ്റിക്കൽ അഡ്വൈസറുമായ റൈറ്റ് റവ. മാർ ജോർജ് മഠത്തിൽകണ്ടത്തിൽ നൽകിയ സന്ദേശം സമ്മേളനത്തിൽ വായിക്കുകയും ചെയ്തു.

സമ്മേളനത്തിലെ മുഖ്യപ്രഭാഷണം CBCI ഡെപ്യൂട്ടി സെക്രട്ടറി ജനറൽ റവ. ഡോ. മാത്യു കോയിക്കൽ നിർവഹിച്ചു. സഭയ്ക്ക് ഇന്ന് ക്രിസ്തുവിൽ ആഴമായി വേരൂന്നിയതും സഭയോട് ഐക്യപ്പെട്ടതും പൊതുജീവിതത്തിൽ ഉത്തരവാദിത്വബോധത്തോടെ ഇടപെടുന്നതുമായ അല്മായ നേതൃത്വമാണ് ആവശ്യമെന്ന് അദ്ദേഹം പറഞ്ഞു.

“പൊതുനന്മയ്ക്കായി പ്രതിബദ്ധതയോടെ പ്രവർത്തിക്കുകയും മനുഷ്യവ്യക്തിയുടെ അന്തസ്സും അവകാശങ്ങളും സംരക്ഷിക്കുന്നതിൽ ധൈര്യം കാണിക്കുകയും വിദ്യാഭ്യാസം, നേതൃത്വം, പ്രൊഫഷണൽ മികവ്, ക്രിസ്തീയ സംരംഭകത്വം എന്നിവയിലൂടെ സമൂഹത്തെ ശാക്തീകരിക്കാൻ സന്നദ്ധരാകുകയും ചെയ്യുന്ന കത്തോലിക്കാ അല്മായ സമൂഹമാണ് ഇന്നത്തെ കാലഘട്ടത്തിന്റെ ആവശ്യം,” റവ. ഡോ. കോയിക്കൽ പറഞ്ഞു.

കത്തോലിക്കാ അല്മായരുടെ നേതൃത്വം സഭയുടെ ആഭ്യന്തര പ്രവർത്തനങ്ങളിൽ മാത്രം പരിമിതപ്പെടാതെ രാജ്യത്തിന്റെ സാമൂഹിക, സാംസ്കാരിക, രാഷ്ട്രീയ, സാമ്പത്തിക, പൊതുജീവിത മേഖലകളിലേക്കും വ്യാപിക്കേണ്ടതുണ്ടെന്നും അദ്ദേഹം വ്യക്തമാക്കി. യുവജനങ്ങൾക്ക് മികച്ച വിദ്യാഭ്യാസവും നേതൃത്വപരിശീലനവും നൽകുന്നതിനോടൊപ്പം തൊഴിൽമേഖലകളിലും സംരംഭകത്വത്തിലും പൊതുസേവനരംഗത്തും അവർക്ക് കൂടുതൽ അവസരങ്ങൾ ഒരുക്കണമെന്നും അദ്ദേഹം പറഞ്ഞു.

തമിഴ്നാട് നിയമസഭയിലേക്ക് അടുത്തിടെ തെരഞ്ഞെടുക്കപ്പെട്ട AICU അംഗം ശ്രീമതി ലിമ മാർട്ടിനെ സമ്മേളനത്തിൽ ആദരിച്ചു. സമൂഹത്തിനും പൊതുജീവിതത്തിനും ശ്രദ്ധേയമായ സംഭാവനകൾ നൽകിയ 16 പേരെയും ചടങ്ങിൽ ആദരിച്ചു.

രാജ്യത്തിന്റെ വിവിധ സംസ്ഥാനങ്ങളിൽ നിന്നുള്ള കത്തോലിക്കാ അല്മായ നേതാക്കളും പ്രതിനിധികളും പങ്കെടുക്കുന്ന സമ്മേളനം AICU-യുടെ ഭാവി പ്രവർത്തനങ്ങൾക്ക് ദിശ നിർണയിക്കുന്നതിനും നിലവിലെ ദേശീയ സാഹചര്യത്തിൽ കത്തോലിക്കാ അല്മായരുടെ ഉത്തരവാദിത്വവും പങ്കാളിത്തവും സംബന്ധിച്ച് ചർച്ച ചെയ്യുന്നതിനുമുള്ള വേദിയായി മാറി.