ബാല്യത്തെ വിവാഹത്തിന്റെ ചങ്ങലയിൽ നിന്ന് മോചിപ്പിക്കാൻ ലോകം ഒന്നിക്കുന്നു

ന്യൂഡൽഹി: ലോകമെമ്പാടുമുള്ള കുട്ടികളുടെ അവകാശ സംരക്ഷണ പോരാട്ടത്തിൽ ചരിത്രപരമായ വഴിത്തിരിവ്. ബാലവിവാഹം, നേരത്തെയുള്ള വിവാഹം, നിർബന്ധിത വിവാഹം എന്നിവ അവസാനിപ്പിക്കുന്നതിനായി നവംബർ 27 ‘അന്താരാഷ്ട്ര ദിനമായി’ ആചരിക്കാനുള്ള പ്രമേയത്തിന് ഐക്യരാഷ്ട്രസഭാ പൊതുസഭ അംഗീകാരം നൽകി. സിയറ ലിയോൺ മുന്നോട്ടുവച്ച പ്രമേയത്തിന് ഇന്ത്യ ഉൾപ്പെടെയുള്ള രാജ്യങ്ങളുടെ പിന്തുണ ലഭിച്ചു.

ഈ ചരിത്ര തീരുമാനത്തിന് പിന്നിൽ സിയറ ലിയോണിന്റെ പ്രഥമ വനിതയും ബാലവിവാഹ വിരുദ്ധ ആഗോള പ്രചാരണത്തിന്റെ പ്രമുഖ ശബ്ദവുമായ ഡോ. ഫാത്തിമ മാദാ ബിയോയുടെ നേതൃത്വവും നിർണായകമായി. സിയറ ലിയോണിന്റെ ശബ്ദം ലോകവേദിയിൽ ഉയർത്തിക്കൊണ്ട്, ബാലവിവാഹം ഒരു സാമൂഹിക ആചാരം മാത്രമല്ലെന്നും കുട്ടികളുടെ മനുഷ്യാവകാശങ്ങളിലേക്കുള്ള ഗുരുതരമായ കടന്നുകയറ്റമാണെന്നും അവർ അന്താരാഷ്ട്ര സമൂഹത്തിന് മുന്നിൽ അവതരിപ്പിച്ചു. സെപ്റ്റംബർ 4-ന് ഐക്യരാഷ്ട്രസഭാ പൊതുസഭയിൽ പ്രമേയം അവതരിപ്പിക്കപ്പെട്ടത് ഈ ആഗോള പ്രചാരണത്തിന്റെ നിർണായക ഘട്ടമായി.

നവംബർ 27 എന്ന തീയതിക്ക് ഇന്ത്യയുമായി പ്രത്യേക ബന്ധമുണ്ട്. 2024 നവംബർ 27-നാണ് കേന്ദ്ര വനിതാ-ശിശു വികസന മന്ത്രാലയം ‘ബാൽ വിവാഹ് മുക്ത് ഭാരത്’ ദേശീയ പ്രചാരണം ആരംഭിച്ചത്. 2030-ഓടെ ഇന്ത്യയെ ബാലവിവാഹമുക്ത രാജ്യമാക്കുകയെന്ന ലക്ഷ്യത്തോടെയാണ് പദ്ധതി മുന്നോട്ട് പോകുന്നത്. ബാലവിവാഹത്തിന്റെ വ്യാപനം കുറയ്ക്കുന്നതിനായി ദേശീയതലത്തിലും സംസ്ഥാനതലത്തിലും ശക്തമായ ഇടപെടലുകൾ നടത്തിവരികയാണ് സർക്കാർ.

അതിനാൽ തന്നെ ഇന്ത്യയുടെ ബാലവിവാഹ വിരുദ്ധ പ്രവർത്തനങ്ങൾക്ക് ആഗോളതലത്തിൽ ലഭിച്ച അംഗീകാരം കൂടിയാണ് ഐക്യരാഷ്ട്രസഭയുടെ പുതിയ തീരുമാനം. ബാലവിവാഹ നിർമാർജനം സുസ്ഥിര വികസന ലക്ഷ്യം 5.3-ന്റെ പ്രധാന ലക്ഷ്യങ്ങളിലൊന്നാണ്. 2030-നകം കുട്ടി, നേരത്തെയുള്ള, നിർബന്ധിത വിവാഹങ്ങൾ ഉൾപ്പെടെയുള്ള ഹാനികരമായ ആചാരങ്ങൾ അവസാനിപ്പിക്കുകയാണ് അന്താരാഷ്ട്ര സമൂഹത്തിന്റെ ലക്ഷ്യം.

ഈ ആഗോള മുന്നേറ്റത്തിൽ ഇന്ത്യയിൽ നിന്നുള്ള Just Rights for Children (JRC) എന്ന കുട്ടികളുടെ അവകാശ ശൃംഖലയും അതിന്റെ സ്ഥാപകൻ ഭുവൻ റിബുവും നടത്തിയ നിരന്തര ഇടപെടലുകൾക്ക് പ്രത്യേക പ്രാധാന്യമുണ്ട്. നിയമനടപടികളെയും സമൂഹതലത്തിലുള്ള ഇടപെടലുകളെയും കൂട്ടിച്ചേർത്താണ് JRC ബാലവിവാഹത്തിനെതിരെ പ്രവർത്തിക്കുന്നത്. ഇന്ത്യയ്ക്ക് പുറത്തേക്കും വ്യാപിക്കുന്ന നിയമ-സാമൂഹിക പങ്കാളിത്ത ശൃംഖലയാണ് സംഘടന വികസിപ്പിച്ചിട്ടുള്ളത്.

ബാലവിവാഹം തടയുന്നതിൽ നിയമത്തിന്റെ കർശനമായ നടപ്പാക്കലിനാണ് ഭുവൻ റിബു പ്രത്യേക പ്രാധാന്യം നൽകുന്നത്. ഐക്യരാഷ്ട്രസഭയുമായി ബന്ധപ്പെട്ട JRCയുടെ ഇടപെടലിൽ അദ്ദേഹം മുന്നോട്ടുവച്ച പ്രധാന സന്ദേശം “Prosecution is Prevention” എന്നതാണ് നിയമലംഘനത്തിന് ശിക്ഷ ഉറപ്പാക്കുന്നത് തന്നെ ബാലവിവാഹം തടയുന്നതിനുള്ള ശക്തമായ പ്രതിരോധമാകുമെന്ന ആശയം.

ഇന്ത്യയിലെ വിവിധ സംസ്ഥാനങ്ങളിൽ സർക്കാർ സംവിധാനങ്ങൾ, നിയമപ്രവർത്തകർ, സിവിൽ സമൂഹ സംഘടനകൾ, പ്രാദേശിക സമൂഹങ്ങൾ എന്നിവയെ ഏകോപിപ്പിച്ച് ബാലവിവാഹം തടയാനുള്ള പ്രവർത്തനങ്ങൾ ശക്തിപ്പെടുത്തേണ്ടതിന്റെ ആവശ്യകതയും ഈ നീക്കം ഉയർത്തിക്കാട്ടുന്നു.

കണക്കുകൾ നൽകുന്ന മുന്നറിയിപ്പ്

ബാലവിവാഹത്തിനെതിരെ ഇന്ത്യ പുരോഗതി കൈവരിച്ചിട്ടുണ്ടെങ്കിലും വെല്ലുവിളി ഇപ്പോഴും വലുതാണ്. NFHS-5 (2019–21) പ്രകാരം 20–24 വയസ്സുള്ള സ്ത്രീകളിൽ ഏകദേശം 23 ശതമാനം പേർ 18 വയസ്സ് പൂർത്തിയാകുന്നതിന് മുമ്പ് വിവാഹിതരായിരുന്നു. ബാലവിവാഹം പെൺകുട്ടികളുടെ വിദ്യാഭ്യാസം തടസ്സപ്പെടുത്തുന്നതിനൊപ്പം നേരത്തെയുള്ള ഗർഭധാരണം, ആരോഗ്യപ്രശ്നങ്ങൾ, കുടുംബാതിക്രമം, ദാരിദ്ര്യത്തിന്റെ തുടർച്ച, സാമ്പത്തിക അവസരങ്ങളുടെ നഷ്ടം എന്നിവയ്ക്കും കാരണമാകുന്നു.

ഒരു ദിനാചരണത്തിനപ്പുറം

നവംബർ 27 ഇനി ഒരു കലണ്ടർ ദിനം മാത്രമല്ല. ഓരോ കുട്ടിക്കും വിദ്യാഭ്യാസത്തിനും സുരക്ഷയ്ക്കും സ്വപ്നങ്ങൾ കാണുന്നതിനും സ്വന്തം ജീവിതത്തെക്കുറിച്ച് തീരുമാനമെടുക്കുന്നതിനുമുള്ള അവകാശമുണ്ടെന്ന ആഗോള പ്രഖ്യാപനമായി അത് മാറുകയാണ്.

സിയറ ലിയോൺ, ഡോ. ഫാത്തിമ മാദാ ബിയോ, ഇന്ത്യ, Just Rights for Children, ഭുവൻ റിബു തുടങ്ങിയവരുടെ വിവിധ തലങ്ങളിലെ ഇടപെടലുകൾ ഒരേ ലക്ഷ്യത്തിലേക്കാണ് വിരൽചൂണ്ടുന്നത് ഒരു പെൺകുട്ടിയുടെയും ബാല്യം വിവാഹത്തിനായി ത്യജിക്കേണ്ടി വരാത്ത ലോകം.

ഐക്യരാഷ്ട്രസഭയുടെ ഈ തീരുമാനം ഒരു പുതിയ അന്താരാഷ്ട്ര ദിനത്തിന്റെ തുടക്കം മാത്രമല്ല; 2030-ഓടെ ബാലവിവാഹം പൂർണമായി ഇല്ലാതാക്കാനുള്ള ആഗോള പ്രവർത്തനത്തിന് പുതിയ രാഷ്ട്രീയവും സാമൂഹികവുമായ ഊർജം നൽകുന്ന ചരിത്രനിമിഷം കൂടിയാണ്.