ഡൽഹിയിൽ കനത്ത മഴ; വെള്ളക്കെട്ട്, ഗതാഗതക്കുരുക്ക്

ഡൽഹിയുടെ മിക്ക ഭാഗങ്ങളിലും ഇന്നലെയും ഇന്നു പുലർച്ചെയുമായി കനത്ത മഴ പെയ്തു. കൊടും ചൂടിന് ശമനമായെങ്കിലും മഴയും കാറ്റും മൂലം വെള്ളക്കെട്ടും ഗതാഗതക്കുരുക്കും ജനങ്ങളെ വല്ലാതെ വലച്ചു. അണ്ടർപാസ്സുകളിൽ വെള്ളം നിറഞ്ഞതു മൂലം പല സ്ഥലങ്ങളിലും വാഹന ഗതാഗതം പൂർണമായും നിലച്ചു. മുനീർക്ക, ബിക്കാജി കാമാ പ്ലേസ്, മിന്‍റോ റോഡ് എന്നിവ ഉൾപ്പെടെ പല സ്ഥലങ്ങളിലും രാവിലെ വാഹന ഗതാഗതം ദീർഘനേരം തടസ്സപ്പെട്ടു.

സഫ്‍ദർജങ്ങിലെ കാലാവസ്ഥാ നിരക്ഷണ കേന്ദ്രം 154 മി.മീ മഴ രേഖപ്പെടുത്തി. മഴ ഇനിയും കനക്കുമെന്നാണ് മുന്നറിയിപ്പ്. മൺസൂൺ ആരംഭിക്കാനുള്ള സഹചര്യങ്ങൾ അനുകൂലമായിട്ടുണ്ടെന്ന് IMD ഒരു പ്രസ്താവയിൽ അറിയിച്ചു.