വേൾഡ് മലയാളി കൗൺസിൽ ഗുജറാത്ത് പ്രൊവിൻസ് ദിനേശ് നായരെ ആദരിച്ചു

വേൾഡ് മലയാളി കൗൺസിൽ ഗുജറാത്ത് പ്രൊവിൻസ്, വേൾഡ് മലയാളി കൗൺസിലിന്റെ ഗ്ലോബൽ വൈസ് ചെയർമാനായി തിരഞ്ഞെടുക്കപ്പെട്ട ദിനേശ് നായരെ ആദരിച്ചു. ബാങ്കോക്കിൽ നടന്ന ബൈനിയൽ ഗ്ലോബൽ കോൺഫറൻസിലാണ് നിയമനം ഔദ്യോഗികമായി പ്രഖ്യാപിച്ചത്. ദിനേശ് നായരുടെ സാമൂഹിക പ്രതിബദ്ധതയും സാംസ്കാരിക പ്രവർത്തനങ്ങളിലൂടെ മുപ്പത് വർഷത്തിലധികം നീണ്ടുനിൽക്കുന്ന സേവന ജീവിതത്തിലെ നിർണായക നേട്ടം കൂടിയാണിത്.

ഇതിനുമുമ്പ് നാലുവർഷം ഗ്ലോബൽ സെക്രട്ടറി ജനറലായും, ഗ്ലോബൽ സെക്രട്ടറിയായും സേവനമനുഷ്ഠിച്ച അനുഭവം ദിനേശ് നായർക്കുണ്ട്. നിലവിൽ ഓൾ ഇന്ത്യ മലയാളി അസോസിയേഷൻ (AIMA) ഗുജറാത്ത് പ്രൊവിൻസിന്റെ പ്രസിഡന്റാണ് . പന്ത്രണ്ടുവർഷത്തിലേറെക്കാലമായി AIMAയുമായി സജീവമായി പ്രവർത്തിച്ചു വരുന്നു.

ഗ്ലോബൽ സെക്രട്ടറി ജനറലായിരിക്കുമ്പോൾ, ലോകമെമ്പാടുമുള്ള മലയാളി പ്രവാസി സമൂഹത്തെ ഒരുമിപ്പിക്കുന്ന നിരവധി പ്രവർത്തനങ്ങൾക്ക് അദ്ദേഹം നേതൃത്വം നൽകി. സമൂഹശക്തീകരണത്തിനും സംഘടനാ വളർച്ചയ്ക്കുമായി ദിനേശ് നായർ നടത്തിയ പ്രവർത്തനങ്ങൾ ശ്രദ്ധേയമാണ്.

വേൾഡ് മലയാളി കൗൺസിലിന്റെ വിവിധ സംസ്ഥാനങ്ങളിലും നഗരങ്ങളിലും പ്രൊവിൻസുകൾ സ്ഥാപിക്കുന്നതിന് അദ്ദേഹം നിർണായക പങ്ക് വഹിച്ചു. ഗ്ലോബൽ സെക്രട്ടറി ജനറൽ, ഇന്ത്യ റീജിയൻ വൈസ് പ്രസിഡൻറ്, ഇന്ത്യ റീജിയൻ ജനറൽ സെക്രട്ടറി, ഗുജറാത്ത് പ്രൊവിൻസ് പ്രസിഡൻറ്, ജനറൽ സെക്രട്ടറി തുടങ്ങിയ നിലകളിൽ അദ്ദേഹം സേവനമനുഷ്ഠിച്ചിട്ടുണ്ട്.