ദിൽഷാദ് ഗാർഡൻ ഫൊറോനാ മതബോധന വാർഷികം ആഘോഷിച്ചു

ന്യൂഡൽഹി: ദിൽഷാദ് ഗാർഡൻ സെന്റ് ഫ്രാൻസിസ് ഓഫ് അസീസി ഫൊറോനാ ഇടവകയിലെ മതബോധന വിഭാഗത്തിന്റെ വാർഷികോത്സവം ആഗസ്റ്റ് 15-ാം തീയതി, വിശുദ്ധ കുര്‍ബാനയോടെയും വൈഭവമുള്ള കലാപരിപാടികളോടെയും കൂടി ഭക്തിപൂർവം ആഘോഷിച്ചു.

രാവിലെ 8:30-ന് ഫരീദാബാദ് രൂപതയുടെ മതബോധന വിഭാഗം ഡയറക്ടർ റവ. ഫാ. ജിന്റോ ടോം മുഖ്യ കാർമ്മികനായി അർപ്പിച്ച വിശുദ്ധ കുര്‍ബാനയോടെ ആഘോഷ പരിപാടികൾക്ക് തുടക്കമായി. പിന്നീട് രാവിലെ 10:00 മണിയോടെ ഇടവക വികാരി റവ. ഫാ. ജോൺ ചൊഴിതറയുടെ അധ്യക്ഷതയിൽ പള്ളിഹാളിൽ നടന്ന പൊതുസമ്മേളനം ആത്മീയതയും സാമുഹിക ഐക്യവും കൊണ്ടും ശ്രദ്ധേയമായി.

അധ്യക്ഷ പ്രസംഗത്തിനുശേഷം സെക്രട്ടറി, അക്സ മരിയ വാർഷിക പ്രവർത്തന റിപ്പോർട്ട് അവതരിപ്പിച്ചു. പരിപാടികൾ ഉദ്ഘാടനം ചെയ്ത് സംസാരിച്ച ഫാ. ജിന്റോ ടോം, ജീവിതത്തിൽ മതപാഠത്തിന്റെയും ആത്മീയതയുടെയും പ്രധാനത്വം കുറിച്ചും, മതബോധനം കുട്ടികളുടെ വ്യക്തിത്വ വികസനത്തിനും സമൂഹ വികസനത്തിനും അടിസ്ഥാനം ആകണമെന്നും ശ്രദ്ധാപൂർവം രേഖപ്പെടുത്തി. മതബോധനം കുട്ടികളുടെ ജീവിതത്തിന്റെയും സമൂഹത്തിന്റെയും ആധാരശിലയാകണം എന്ന് ചടങ്ങിൽ ആശംസകൾ നേർന്നവരൊക്കെ പറഞ്ഞു.

കുട്ടികൾ തയ്യാറാക്കിയ വിവിധ കലാപരിപാടികൾ ഓർമ്മയിൽനിൽക്കുന്നതായിരുന്നു. ആക്ഷൻ സോങ്ങ്, ബൈബിള്‍ സ്കിറ്റ്, സംഗീത നൃത്തങ്ങൾ, മ്യൂസിക്കൽ ബാൻഡ്, വിവിധ വിഭാഗങ്ങളിലെ സംഘനൃത്തങ്ങൾ എന്നിവ കുട്ടികളുടെ പ്രതിഭയെയും ആത്മീയബോധനത്തെയും പ്രതിഫലിപ്പിച്ചു. എല്ലാ വയസുകാരും – പ്രൈമറി, സെക്കൻഡറി, ഹൈസ്‌കൂൾ വിഭാഗങ്ങൾ – പരിപാടിയിൽ സജീവമായി പങ്കെടുത്തു. കേറ്റിക്കിസം ക്ലാസുകളിൽ ഉന്നത വിജയം നേടിയ വിദ്യാർത്ഥികൾക്ക് ട്രോഫികളും സർട്ടിഫിക്കറ്റുകളും വിതരണം ചെയ്തു.

രാവിലെ പത്ത് മണിക്ക് ആരംഭിച്ച വാർഷികാഘോഷത്തിൽ പ്രധാനാധ്യാപകൻ ശ്രീ സണ്ണി സേവ്യർ സ്വാഗതവും, റവ. സിസ്റ്റർ മാഗി നന്ദിയും പറഞ്ഞു. പാരിഷ് കൗൺസിൽ അംഗങ്ങൾ, വിവിധ ഭക്തസംഘടന ഭാരവാഹികൾ, പി. ടി. എ. പ്രതിനിധികൾ, രക്ഷിതാക്കൾ, തുടങ്ങിയവരുടെ സാന്നിധ്യവും പങ്കാളിത്തവും പരിപാടിയെ വേറിട്ട അനുഭവമാക്കി മാറ്റി