ഗുരുഗ്രാം സെന്റ് ഗ്രീഗോറിയോസ് ഓർത്തഡോക്‌സ് ദേവാലയ കൂദാശ നടത്തി

പരിശുദ്ധ പരുമല തിരുമേനിയുടെ നാമത്തിൽ ഗുരുഗ്രാമിൽ പണികഴിപ്പിച്ച പുതിയ സെന്റ്. ഗ്രീഗോറിയോസ് ഓർത്തഡോൿസ് ദേവാലയത്തിന്റെ കൂദാശാകർമങ്ങൾ നടത്തി. ഓർത്തോഡോക്സ് സഭാ പരമാദ്ധ്യക്ഷൻ പരിശുദ്ധ ബസേലിയസ് മാര്‍ത്തോമ മാത്യൂസ് തൃതീയന്‍ കാതോലിക്കാബാവ തിരുമനസ്സിന്റെ മുഖ്യകാർമ്മികത്വത്തിൽ, കൊൽക്കത്ത ഭദ്രാസനാധിപൻ അഭിവന്ദ്യ അലക്സിയോസ് മാർ യൂസേബിയോസ്, ഡൽഹി ഭദ്രാസനാധിപൻ അഭിവന്ദ്യ ഡോ. യൂഹാനോൻ മാർ ദിമെത്രിയോസ് എന്നീ പിതാക്കന്മാർ കൂദാശ ചടങ്ങുകൾക്ക് നേതൃത്വം നൽകി. തുടർന്ന് നടന്ന പൊതുസമ്മേളനത്തിൽ മുൻകേന്ദ്രമന്ത്രി ശ്രീ. അൽഫോൻസ് കണ്ണന്താനം ഉത്‌ഘാടനം ചെയ്തു.

ഗുരുഗ്രാം സെക്ടർ 52 ൽ ഹരിയാന സർക്കാർ അനുവദിച്ചുതന്ന സ്ഥലത്താണ് പുതിയ ദേവാലയം ഉയർന്നിരിക്കുന്നത്. 2019 ജൂലൈ 28ന് ഭാഗ്യ സ്മരണാർഹനായ പ. ബസേലിയോസ് മാർത്തോമാ പൗലോസ് ദ്വിതീയൻ കാതോലിക്കാബാവ തിരുമനസ്സ് ദേവാലയത്തിന്റെ ശിലാസ്ഥാപനകർമ്മം നിര്വഹിക്കുകയുണ്ടായി . ഏകദേശം പതിനായിരം ചതുരശ്ര അടി വിസ്തീർണത്തിൽ പണികഴിപ്പിച്ചിട്ടുള്ള ദേവാലയത്തിൽ ഒരേസമയം മുന്നൂറു പേർക്ക് ആരാധനയിൽ പങ്കെടുക്കാനാകും. താഴത്തെ നിലയിൽ വിവിധചടങ്ങുകൾക്കായുള്ള ഒരു ഹാളും, മുകളിലത്തെ നിലയിൽ താമസസൗകര്യത്തിനായി മുറികളും, ഉൾപ്പെടെയാണ് ദേവാലയ നിർമാണം പൂർത്തീകരിച്ചിരിക്കുന്നത്.

ചടങ്ങിൽ ശാലോം ഹിൽസ് സ്കൂളിന്റെ ചെയർപേഴ്സൺ ശ്രീമതി. ലില്ലിക്കുട്ടി ജോർജ്, ശ്രീ. അലക്സാണ്ടർ ജോർജ് മുത്തൂറ്റ്, വന്ദ്യ കോർ എപ്പിസ്കോപ്പ റെവ. ഫാ.ഫിലിപ്പ് എം സാമുവേൽ എന്നിവർ ആശംസകൾ അറിയിച്ചു. പള്ളിമാനെജിങ് കമ്മിറ്റിക്കുവേണ്ടി ശ്രീ. ജോജി പി തോമസ് നന്ദി പ്രകാശിപ്പിച്ചു.